【點解咁在意「適飲溫度」】

平時有無留意餐廳待應serve酒嘅時候會放入冰桶? 點解某d酒需要keep住凍嘅? 通常餐廳serve白酒/香檳嘅時候會放入冰桶雪住枝酒,唔可以室溫飲用咩? 唔同嘅酒有唔同嘅「適飲溫度」又係點解?

溫度對葡萄酒黎講係十分重要,由發酵到陳年,再到倒入酒杯前都有不同嘅最適合溫度。今次先講講同大家有關係嘅飲用溫度。

飲用溫度對大家享受葡萄酒好有好大影響:由氣味到入口嘅感受,仲有香檳嘅氣泡量。過高嘅飲用溫度會好容易察覺到有酒精味,氣泡都會消散得好快,香氣盡失;酸度(甜度亦然)偏高嘅白酒都需要保持低溫飲用,口腔對酸度(甜度)的敏感度會隨溫度上升,如果枝白酒無放落冰桶就會發現愈飲愈酸。 溫度過低就會令酒嘅香氣收斂,細緻嘅香氣會被壓抑,丹寧感都會更重,造成十分苦澀嘅口感,同時令葡萄酒嘅結構失去平衡。

紅酒嘅飲用溫度一般介乎攝氏12-18度,白酒介乎攝氏6-12度,香檳大概6-11度。厚身酒款飲用溫度較高,例如陳年意大利酒/波爾多/Shiraz為主嘅酒;丹寧較少,入口輕柔嘅Burgundy/無用木桶陳年嘅白酒/澳洲Sauvignon Blanc最好稍微雪凍再飲。

香港室溫平均二十度以上,就算係最厚身嘅紅酒都唔適合就咁飲;無酒櫃嘅做法就係飲之前雪入雪櫃一到兩小時。當然以上嘅指引係大部份款適用,某d特別嘅未必適用,最好都係先雪凍咗先,倒落杯後如果覺得太凍而令香氣唔可以散發出黎,就放返暖少少再飲。