睡前一小杯

好多人都有個習慣,就係訓前飲一少杯酒,幫助入睡,大多會揀Ruby Port,因為甜甜地 易入口,開瓶後又可以放返雪櫃,keep得比較耐。但係! 我地有更好嘅推薦….

佢就係貴腐甜酒啦! 一樣係高質而且易入口嘅好選擇~ 講起貴腐甜酒,大家都可能第一時間會諗起Sauternes,但我地為大家介紹多個相對少人識,但質素一樣掂嘅區 – Barsac 巴薩克。

Barsac其實係屬於Sauternes區內嘅甜酒產區,雖然都係貴腐甜酒,但style同Sauternes有少少唔同。前兩日Happy Friday 我地Wine Advisors一齊試咗枝Barsac,佢比Sauternes輕身啲,水果味更濃郁,而非花香或蜜糖主導。唔好以為甜酒就會好似汽水咁死甜,靚Dessert Wine正正有返足夠酸度平均,飲落甜而不膩就係最高境界。

而且點解佢啱訓前飲?除咗易入口外,就係可以開瓶後放雪櫃keep一個星期左右,唔似普通紅白酒咁要「餐餐清」。所以想揀啲酒訓前放鬆下不妨考慮下貴腐甜酒~ 飲完等你可以有個甜蜜嘅美夢~~

不過小提示,訓前嘅意思最好係正式入睡前一個半鐘以上,唔好真係飲完即刻攤落床,否則會令個肝不能係睡眠時休息,更有機會無法進入深層睡眠,反而搞到半夜「眼光光」!